नको म्हणू मज बदललीस तू अशीच आहे तुझी प्रिया
नको म्हणू तिज घडवलेस तू अशीच आहे तुझी प्रिया

घडवायाचे कुणी कुणाला जो तो घडतो स्वतः स्वतः
प्रेमाने ती फुलते खुलते अशीच आहे तुझी प्रिया

कुणी कुणाहुन नाही सुंदर कशास तुलना करिशी तू
तुलनेने या कोमेजे ती अशीच आहे तुझी प्रिया

गोड हासते खरे बोलते म्हणुन आवडे सर्वांना
तुझ्याच इतुकी जपते जीवा अशीच आहे तुझी प्रिया

नाव ‘सुनेत्रा’ अर्थपूर्ण हे मला शोभते किती किती
हृदयामध्ये बिंब पाहते अशीच आहे तुझी प्रिया

मात्रावृत्त -( ८+८+८+६=३०मात्रा)