वारा चंचल – VAARAA CHANCHAL


शिशिराच्या पाचोळ्यातिल मज अक्षर अक्षर हाक मारते
निरोप घेण्या वाज वाजते वसंत वाऱ्यावरती झुलते
पीत पोपटी मृदु पर्णांकुर पाहुन सृष्टी हात जोडते
किरण कोवळे चराचरावर मोद सांडता हृदय डोलते

पानांच्या जाळीतुन उतरे ऊन खोडकर हळदी तरुतळ
मृदा तळीची उडत राहते वारा चंचल ऊन न चंचल
गतकाळाच्या आठवणीतिल पिसे लहरती वाऱ्यावरती
संधिकाल की उषाकाल हा कोडे पडते क्षितिजावरती

निसर्ग ईश्वर माझ्या पाठी म्हणतो मजला जा जा पुढती
लिही लिही तू रोज वासरी मिळेल तुजला सदैव शांती
कल्पतरू अंगणी बहरला फुले मृदेवर घन टपटपती
उणे न काही मजला आता गीत मनीचे पक्षी गाती


Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.