भरड पिठाची, केली पोळी, सत्यशोधनासाठी
मी कर्मांची, केली होळी, सत्यशोधनासाठी

नीटनेटके, रचुन स्मृतींना, बांधियले प्रेमाने
जळी बुडविण्या, केली मोळी, सत्यशोधनासाठी

अहंकार अन, मिथ्यात्वाचे, करुन वस्त्रगाळ चूर्ण
सहज फेकण्या, केली गोळी, सत्यशोधनासाठी

मत्त वासना, तुडवुन पायी, जुळवुन दो हातांना
ओंजळिची मी, केली झोळी, सत्यशोधनासाठी

एकएकटे, कषाय गाठुन, कत्तल करण्यासाठी
देवगुणांची, केली टोळी, सत्यशोधनासाठी

मात्रावृत्त(८+८+१२ =२८ मात्रा)