गळ्यात घालुन गळा डहाळी अक्षत पानांची उधळे
फुलांस कोमल खुडून अलगद अक्षत कुसुमांची उधळे

सरोवरातिल नीर सुगंधित हरित टेकडी हवा खुली
उंच मनोरा बिंबावरती अक्षत नाण्यांची उधळे

हूड निर्झरासंगे वारा खेळ खेळतो लपाछपी
सूप उडवुनी हातांमधले अक्षत धानांची उधळे

कार्तिकातली शुद्ध प्रतिपदा दिवे लावुनी आकाशी
अग्निपुष्प फिरवून गरगरा अक्षत ठिणग्यांची उधळे

कोर बिजेची भाळावरती रेखुन बाला चंद्रासम
अंगणातल्या निशिगंधेवर अक्षत ताऱ्यांची उधळे