This Ghazal is written in akshargan vrutta.
Vrutta is GAA LA GAA LA,  GAA LA GAA LA, GAA LA GAA LA, GAA LA GAA.

पाहुनी खरी प्रभात लागले फुलायला
शुभ्र नीर त्यात बिंब लागले पहायला

मीच तव प्रिया सखी सतर्क स्वामिनी तरी
बालकांत बाल होत लागले हसायला

आत्मदेव अंतरात मंदिरात मूर्त तो
सगुण रूप माणसात लागले दिसायला

ना कळेल वा कळेल सत्य आज ना उद्या
मी सुखात एवढेच लागले कळायला

संगती तुझ्या सदैव मी असेन सारथ्या
बघ सुनेत्र चारुतेत लागले रमायला

वृत्त – गा ल गा ल, गा ल गा ल, गा ल गा ल,  गा ल गा.