मायावी चित्तातिल खळबळ कधी प्रसाविते काव्याला
नेणिवेतली अबोध सळसळ कधी प्रसाविते काव्याला

नेत्र पापण्या मिटती जेव्हा भावभावना कोंडाया
मोत्यांसम अश्रूंची सळसळ कधी प्रसाविते काव्याला

संधिकालचे रंग लोपता छायांनी मन आक्रमिता
कातरसमयीची हर हळहळ कधी प्रसाविते काव्याला

नकळत काटे करिता जखमा गुलाबवेड्या हृदयाला
सुवासिक रक्ताची भळभळ कधी प्रसाविते काव्याला

खोल गूढ मौनी डोहाला वळसा घालित जाणाऱ्या
हूड झऱ्याची सुरेल खळखळ कधी प्रसाविते काव्याला

मात्रावृत्त (१६+८+६=३० मात्रा)