मधाळ प्रीती वचनामध्ये उतरू दे ग
सुकलेले सुख जळणामध्ये उतरू दे ग

बुडून जाता भरतीच्या या उचंबळात
मधुरा भक्ती भजनामध्ये उतरू दे ग

दे चटका डाळीस शिजवुनी जड कढईत
रंग गुळाचा पुरणामध्ये उतरू दे ग

जिरे मिरे वाटून फोडणी दे डाळीस
स्वाद तयांचा वरणामध्ये उतरू दे ग

रदीफ माझ्या गझलेमधले वादातीत
पदे आरत्या कवनामध्ये उतरू दे ग

खणखणणारी पंचधातुची सोनियाची
घनसर नाणी चलनामध्ये उतरू दे ग

मौक्तिकमाला टपटप झरण्या लेखणीतुन
सजल गडद ढग नयनामध्ये उतरू दे ग

शिशिर प्रभाती धुके मलमली निळसर श्वेत
दिशादिशांच्या वसनामध्ये उतरू दे ग

प्रीतिसंगमी उधाणलेली कृष्णामाय
स्नानासाठी धरणामध्ये उतरू दे ग

चरण मुनींचे प्रक्षाळाया काव्य माझे
भाव शुद्ध हर चरणामध्ये उतरू दे ग

गारठलेल्या जीवांसाठी सांजपंखी
ऊन केशरी कुरणामध्ये उतरू दे ग

फुलबागेतिल मौन सुगंधी मरुत लहरी
शीतल चंचल पवनामध्ये उतरू दे ग

मस्त जादुई झुले बांधण्या सप्तरंगी
तीर कामठा गगनामध्ये उतरू दे ग

मुनीजनांना हितकर वाटे सैंधव मीठ
ती हितकरता लवणामध्ये उतरू दे ग

मूक पशूंचे जाणायाला लेश्यारूप
भाव तयांचे ग्रहणामध्ये उतरू दे ग

जुनी पुराणी गीते काही विसरायास
गझल गझाला भवनामध्ये उतरू दे ग

जीवनदायी जागृत प्रज्ञा सुप्त प्रतिभा
कलेकलेने सृजनामध्ये उतरू दे ग

गझल मात्रावृत्त (मात्रा २३)