माझ्यावरी फिदा ही माझी गझल दिवाणी
ती तोलते मलाही आहे किती शहाणी
मी पाझरे अताशा हलक्याच चाहुलीने
हृदयात अमृताच्या आहेत कैक खाणी
दचकून जाग आता मजला कधी न येते
असते सदैव जागी माझ्यात एक राणी
अफवाच पेरती ते त्यांचेच पीक घेती
असली पिके विकाया लिहितात ते कहाणी
माझी-तुझ्यातली ही प्रीतीच तारणारी
गोष्टीतुनी खळाळे मम प्रेमरूप वाणी
पोराटकी पुरेना अन नाटके फुकाची
स्मरुनी तिच्या गुणांना गाऊत गोड गाणी
तृष्णा-तहान शमण्या या लालची जनांची
भरलेत माठ सारे या प्यावयास पाणी
आनंदकंद -अक्षरगणवॄत्त
लगावलीः गागालगा लगागा गागालगा लगागा
मात्राः २२१२ १२२ २२१२ १२२ = २४ मात्रा)