पाताळातुन तुजला शोधिन नाव सुनेत्रा लावे मी
प्रकाशवेगा मागे टाकिन नाव सुनेत्रा लावे मी

जरी नाटके करून सोंगे येशिल माझ्या पुढ्यात तू
तुझे मुखवटे उखडुन फेकिन नाव सुनेत्रा लावे मी

कलशावरती करुन मुलामा म्हणे जरी तो चंद्र पहा
प्रकाशासही काळे फासिन नाव सुनेत्रा लावे मी

मणामणाचे जरी घुंगरू दिलेस मज तू बांधाया
तुडवुन तुजला गाईन नाचिन नाव सुनेत्रा लावे मी

ही न सुनेत्रा ही तर वेश्या मला तोतया वाटे ती
म्हणणाऱ्याचे मुस्कट दाबिन नाव सुनेत्रा लावे मी

मात्रावृत्त(८+८+८+६=३०मात्रा)