घनदाट कुंतलावरी कृष्ण तव लिहिल्या श्यामल गझला मीही
वनभृंग जणू तव नयनांवर दो लिहिल्या निर्जल गझला मीही

भिजवून भावना दवबिंदूंनी पिंपळ पानावरती सुकल्या
मम् जुनी लेखणी झरझर फिरवुन लिहिल्या मंगल गझला मीही

मनमोर नाचता मेघांच्या छायेत फुलवुनी पूर्ण पिसारा
आसूड मेघनेमधून ओढत लिहिल्या चंचल गझला मीही

भरभरुन ओंजळी उधळत मोती जलद गर्जता आभाळातुन
तापून कावल्या मातीवरती लिहिल्या प्रांजल गझला मीही

नवनवोन्मेषशालिनी सुंदरा प्रतिभा मम हृदयात बहरता
विसरून घुंगरू मौनामध्ये लिहिल्या निर्मल गझला मीही