मयुरवाहिनी
सरस्वती शारदा सुंदरी मयुरवाहिनी
वीणा पुस्तक शीलधारिणी मयुरवाहिनी
मोरपिसांच्या पिंछीचा मृदु स्पर्श मुलायम
जागवितो तव सयी अंतरी मयुरवाहिनी
काळ्या कोऱ्या पाटीवरती नऊ रसांच्या
रेषा तोलत उभी लेखणी मयुरवाहिनी
जललहरींचे वसन धवल घन दले गुलाबी
कंच पाचु तनु मनगट हळदी मयुरवाहिनी
चित्र रेखुनी फुलवेलीचे रंगबिरंगी
कलम टेकवुन उभी पद्मश्री मयुरवाहिनी
करात नाजुक स्फटिक मण्यांची माला सुंदर
दिव्य प्रभावळ मुखचंद्राची मयुरवाहिनी
कृष्ण अंबरी पूर्ण चंद्रमा झरे चांदणे
नाद अनाहत आत्ममंदिरी मयुरवाहिनी