ऋतू सुखाचे येतिल आता
धरणीसंगे गातिल आता
पडेल पाऊस वेळेवरती
धान्याने मग भरतिल पोती
फळ फळावळ भाजीपाला
गाई गुरांना चारा ओला
कमी न काही पडेल आता
ऋतू सुखाचे येतिल आता
धरणीसंगे गातिल आता
रानामध्ये झरे वाहतिल
झाडांवरती घरटी झुलतिल
फूलपाखरे आणिक भुंगे
हवेत उडतिल संगे संगे
माणूस आता होईल दाता
ऋतू सुखाचे येतिल आता
धरणीसंगे गातिल आता
वाड्या-वस्त्या स्वच्छ देखण्या
कुणी न लाजे कामे करण्या
लांडी-लबाडी आणिक चोरी
करेल कोणी ना शिरजोरी
कुणी न मारिल फसव्या बाता
ऋतू सुखाचे येतिल आता
धरणीसंगे गातिल आता