शुभ्र चांदणे निळसर अंबर माझे दादा
वसुंधरेवर हसरे झुंबर माझे दादा

जरी भासती भोळा शंकर माझे दादा
करतिल आता जंतर मंतर माझे दादा

माणसातुनी देव घडविती संत-महात्मे
फुलांस जपती फोडुन कंकर माझे दादा

प्रेमासाठी देशासाठी हटून मागे
जिंकतील सत्याचा संगर माझे दादा

किती गोरटे किती देखणे रुबाब करतिल
खरे हेच पण जगात सुंदर माझे दादा

विणून धागे वसने देती दहा दिशांना
अनंत शंभर जणु विश्वंभर माझे दादा