असून वळणे रीत प्रीतिची सरळ तुझी मज आवडते
ऐक प्रियतमा तुझ्याच इतुकी गझल तुझी मज आवडते

कधी झरा हा खळाळणारा किती मनाला लोभवतो
डोहासम पण गहिरी प्रीति सजल तुझी मज आवडते

विरघळते तव नयनी पुरती खास तुझी ही नजर अशी
ओठ उघडण्या एक अंगुली कुशल तुझी मज आवडते

कितीक नजरा चंचल भ्रमरी भुरळ पाडती जरी कुणा
गोठवणारी लीन पापणी अचल तुझी मज आवडते

रंगबिरंगी नकली वेष्टन हवे कशाला श्रद्धेला
अस्तित्वावर उत्कट भक्ती विमल तुझी मज आवडते