ओठांमध्ये पालवलेले बोलायाचे आहे मजला
चित्रामध्ये आठवलेले रेखायाचे आहे मजला

चितारते मी सागर नयनी मिटते डोळे गाज ऐकुनी
डोळ्यामध्ये रंगवलेले वाचायाचे आहे मजला

रंग-गंध वेचून फुलांचे मधुसंचय मी करित राहिले
श्वासामध्ये साठवलेले प्राशायाचे आहे मजला

शेकोटीची उब जांभळी शब्द कापरे तप्त जाहले
काव्यामध्ये तापवलेले ओतायचे आहे मजला

तव झुळकीने मोहरलेल्या कळ्याफुलांचे मुग्ध रंग हे
हृदयामध्ये गोठवलेले शिम्पायाचे आहे मजला

अंगण हिरवे सडा फुलांचा घर कौलारू एक सुनेत्रा
गंधामध्ये सारवलेले बांधायाचे आहे मजला