दंडावर कुळकुळीत काळ्या भुंगा ठोळ्या
अवघडली लेखणी करातिल भरून झोळ्या

उभ्या उभ्या भाजून भाकऱ्या डबे भरुनी ग
कामाला बिगिबिगी चालल्या बाया भोळ्या

कथा समीक्षा चित्र काव्य धन लुटावयाला
आंतरजाली टोळधाडीसम आल्या टोळ्या

पुण्याईची घागर सांडे आभाळातुन
ओंजळीत तव जीव जपाया धर पागोळ्या

दक्ष सजग मी सदा सर्वदा व्यवहाराला
मुक्तक मेवा गझल रुबाई मम चारोळ्या

हत्ती घोडे सर्कशीतले मरतुकडे बघ
पोटासाठी त्यांचे जगणे अन आरोळ्या

इरकल लुगडे नऊवार नेसून सुनेत्रा
रंगबिरंगी चिटे जोडुनी शिवते चोळ्या