उन्हाच्या फुलांचे थवे स्नान करण्या
इथे रोज येती उदक पान करण्या

कुठे काय कैसे कशाला कुणाला
असे प्रश्न का हे कनक दान करण्या

मुक्या भावना तव नको कुस्करू रे
बळी तेच देतील सोपान करण्या

ढगांचा विजेचा नभी खेळ रंगे
तुझे पावसा नित्य गुणगान करण्या

प्रमाणात केले तरी कैक फाटे
कळ्या पाकळ्यांना अधिक सान करण्या

श्रुताची म्हणे पंचमी आज आहे
तसे पान कोरे नसे यान करण्या

अहंकार हा की लढा संपवेना
कुणी आज यावे नजर म्यान करण्या

खरे काय समया तुझे नाव गाळुन
किती शेर मोजू जिना ध्यान करण्या

लिहू काय मक्त्यात आता भरीचे
‘सुनेत्रा’ जिवाचे पुन्हा रान करण्या