धर्म अर्थातिल कमाई घागरीने ओत ज्येष्ठा
बहरण्या ग्रंथी तराई घागरीने ओत ज्येष्ठा

सागरी भुवनी वनी जलधार घुसळत मुसळ नाचे
तैलचित्रातिल सवाई घागरीने ओत ज्येष्ठा

कुमुदिनी निशिगंध चाफा मोगरा बकुळी सुगंधी
व्हावयाला दिलजमाई घागरीने ओत ज्येष्ठा

जलद भरता मोतियांनी मुक्तकांची माळ झरण्या
मुक्तछंदातिल रुबाई घागरीने ओत ज्येष्ठा

दाटता घन अक्षरांना तोलणारी मर्मग्राही
जोहरी मी ना कसाई घागरीने ओत ज्येष्ठा

वाचले अनुयोग काही फक्त नाही चाळले ते
वेड ना हे मम भलाई घागरीने ओत ज्येष्ठा

धाक खाकी शायरीचा रंग चढवे पाप जळण्या
लाल काळी पीत शाई घागरीने ओत ज्येष्ठा

लोळुनी मातीत ज्यावर नीज येते मज सुखाची
चिंब भिजण्या चारपाई घागरीने ओत ज्येष्ठा

वेळ ना जाते कधीही येत असते जागवीण्या
शब्दशिल्पावर निळाई घागरीने ओत ज्येष्ठा

धावदोरा टीप उलटी हेम तिरपी शिवण हस्ती
शिकविण्या धंदा शिलाई घागरीने ओत ज्येष्ठा

भय कशाचे गावयाला मेघमल्हारा सुनेत्रा
संपता वैशाख घाई घागरीने ओत ज्येष्ठा